مرثيه ناصر الفراعنه في ولده

.. { قد يستغرب الناس كيف يرثي انسان ابنه وقد ولد ميتا ولم يره امامه وليس له ذكريات معه الا انني هنا رأيت ذكريات أغفلها الشعراء وليس هناك من لم تمر عليه وهذه القصيدة رثاء في مولودي وهدية مني إلى أمه ربط الله على قلبها وعوضها فيه وجعله شفيعا لأبويه .. القصيدة مرثية طويلة تعددت اغراضها من رثاء الى تبصر في الزمان الى حكم والفلسفة } ..








ما أراني فاعلاً في الليل إن أرخـى سدولـه؟
ما أراني فاعلاً والصبح قـد حـان احتضـاره
طفلي اللي مات في اول يوم ما ذاق الطفولـه
عاجله سهم القدر واختـاره الله فـي جـواره
طفلي اللي مات في غمضة طرف ما حال حوله
يوم عمر الآدمي مـا كـان يومـاً باختيـاره
يا وجودي يوم لفّوا شاحـب الأكفـان حولـه
ما تقـول إلا شظيّـة لؤلـؤٍ داخـل محـاره
يا وجودي يوم أطالع فيه,في عرضه وطولـه
تنتحر في العين منـي دمعـةٍ كنْهـا شـراره
نفس عين آبوي عينه بل ونفس الزول زولـه
وبالأماره, فيه من عمه(شبيـبٍ) كـم أمـاره
جابه الله مثل هتّان المطـر ساعـة هطولـه
ديمٍ احيـا بهجـة امـه تـارةٍ وآبـوه تـاره
ويوم شاف الشرّ من صوب آهلهْ يشعب ذلوله
حطّ دون صدورهم صدره من الرحمه ستـاره
ومات توّي مـا بعـد بإيـديّ لبّستـه نعولـه
مات توّي ما بعد ساويـت فـي ثوبـه زراره
كنّ عينه يوم مات تقول:بابا, ويش هـو لـه؟
يوم تبكي وانت تدري مين انا ذلحيـن جـاره!
كلنا راحل وخيـر النـاس مـن زوّد رحولـه
باغتنام الصالحات وكـلّ كسـرٍ لـه جبـاره
طفلي اللي صوّبت كبده قبل ساعـة وصولـه
بندقٍ من عين حاسد واودعت قلبـي طشـاره
يا وجودي ما لقيت أنسب لمولـودي مقولـه
من مقولة: يا وجه صبحٍ تحرّر مـن خمـاره
أو ثغـر بـرقٍ تهامـيٍّ تبسّـم فـي ثعولـه
ضوح مصباحه عليه يـورّد النجـدي بكـاره
يوم اشيله ما تقول اشيل شـيٍّ مـن نحولـه
آتشمّم ريحته -من فجعـة القلـب- بحـراره
يوم جيت العب معاه وغاب قلبي مـن ذهولـه
يوم ما شفته تبسّم لي وانـا فـي اول زيـاره
قمت أحدث عنه نفسي- والعرب حولي وحوله
ليت ما هو ميْتٍ؟إلا ميت! ما تبغى استشـاره
اتْخنقنـي عبرتـي يـوم آتذكّـر مـا تقولـه
عنه أمّه يـوم أنـا فـي ديـرةٍ ماهيـب داره
آتذكّر يوم هو فـي بطنهـا يحـرّك رجولـه
وانتعيرّ:ليت ما هـو أقشـرٍ؟ لبّـى القشـاره
كم سهرنا معه ليله كامله مـن كبـر هولـه
لين صرنا نعَرْف موعد قومته داخـل قـراره
وان تأخّر ما صحى في موعده قمنـا نصولـه
ننغزه يا من يمين البطـن وإلا مـن يسـاره
ما نبي شيْ بسْ نبي نضحك على ردّة فعولـه
ننغزه ويفز خايـف مـا درى ويـش العبـاره
من يدي غيمة على أيدي الملائكـة محمولـه
غيمةٍ من نور ما تشبـه نضارتهـا نضـاره
يا إلاهٍ كل ما فـي الأرض طـراً سبّحـوا لـه
شفّعه فينـا غـداً واجعلـه لابوانـه بشـاره
في نهـارٍ فيـه أعنـاق الشياطيـن مغلولـه
يتلقّفنـا مثـل مـا يلقـف الحـاوي صـراره